طقس فلسطين الحدث - عاصم عصيدة

كثير  منا  بتساءلوا ليش ما بنزل الثلج على الرغم من الجو البارد جداً وشو أصلا بلزم للثلج لينزل ؟ 
الموضوع اله علاقة بحرارة طبقات الجو المختلفة وكلما كانت الفوارق الحرارية كبيرة كانت فرص الثلوج أكبر ...
طبقات الجو اللي بتعنينا في موضوع الثلوج على ارتفاعات 5 آلاف متر و 3 آلاف متر ، و 1450 متر .
كل طبقة من هاي الطبقات بلزمها حرارة معينة للتعاون ع انجاز مهمة تحويل قطرات الماء الى ثلوج ، 
مثلاً طبقة ال 5 آلاف متر بحاجة لحرارة  -32 درجة  + -13 درجة ع طبقة ال 3 آلاف متر ، + -3 درجات ع طبقة ال 1450 متر لتجيب ثلج ع ارتفاعات 600 متر فأعلى 
طبعا التيارات الهوائية الباردة الهابطة الى الأرض بتغلف بلورات الثلج بحرارة باردة جداً لإرتفاع معين وبعدها بتسخن حال كان المكان منخفض ..
بمعنى اذا افترضنا انه التوقع لثلوج فوق 900 متر ، ففي حال وجود سحب ركامية عنيفة بنزل التوقع الى 700 أو 800 متر لفترة مؤقتة فبتلاحظ بنزل ثلج وبعدها الشوط الثاني مطر ،، 
في عاصفة أليكسا 2013 كانت  القيم الباردة شبه ثابتة ع حرارة تسمح باستمرار تساقط الثلوج على مدار 48 ساعة.
موضوع تكون الثلوج موضوع معقد جداً ونص درجة في إحدى الطبقات بتعطل احياناً مهمة تحويل الماء الى  ثلج.
المهم في الموضوع ،  طالما عرفنا هيك معلومات ، ليش ما بتوصل فلسطين منخفضات بتحمل هيك قيم ، أو بتيجي بفترات متباعدة قد تستغرق سنوات مثل حالتنا اليوم (5 سنوات دون ثلوج)  ، الصراحة قيم زي هاي بتوصل سنوياً على مناطق في شمال سوريا ولبنان وتركيا ، بس فلسطين  والاردن مسألتها مختلفة .

هيك قيم بدها منخفض ينزل بشكل مباشر دون معوقات من الغرب (منخفضات تولد من جديد الى الغرب منا تساهم في اضعاف ا لنزول) ومنذ سنوات والمنخفضات غير قادرة ع التعمق إما بسبب منخفضات أخرى الى الغرب أو لوجود تيارات دافئة من الصحاري المحيطة تدفع بالجبهات الباردة الى الشمال.